Kimbunga chabomoa nyumba 80 Nyengedi

ZAIDI ya kaya 80 za Kijiji cha Nyengedi, kilichoko katika Jimbo la Mtama, Wilaya ya Lindi Vijijini,  hazina mahala pa kuishi baada ya nyumba zao kuezuliwa na kimbunga kilichoambatana na mvua kubwa iliyonyesha juzi kijijini hapo.

Akithibitisha kutokea kwa maafa hayo, Ofisa Mtendaji wa Kijiji cha Nyengedi, Ally Mpili, alisema mvua hiyo ilinyesha takriban dakika 45, zikiwamo 15 za kimbunga hicho kilichoezua pia paa la darasa la nne la Shule ya Msingi Nyengedi.

“Wakazi wa hapa walikosa mvua kwa takribani wiki moja, kabla ya ghafla juzi kuanza kunyesha kuanzia saa 8:30 mchana hadi saa 9:15 alasiri, lakini kwa bahati mbaya mvua hiyo ikaambatana na upepo mkali, ulioezua na kubomoa nyumba 81 na kuezua paa la darasa la nne,” alisema Mpili.

Alibainisha uharibifu huo umewaacha bila makazi takriban watu 250 waliokuwa wakiishi katika kaya hizo, ambao kwa sasa wanalala chini ya miti, kwenye magofu yao na baadhi kujihifadhi kwa ndugu zao.

Kutokana na hali hiyo, wameiomba serikali kuharakisha misaada ya kibinadamu, ili kuwanusuru na athari zitokanazo na mvua za masika zinazoendelea.

Mpili alisema Mkuu wa Kituo cha Polisi Mtama, aliyemtaja kwa jina moja la Naska, alikuwa wa kwanza kufika kijijini hapo kujionea uharibu uliotokea, wakati Mkuu wa Wilaya na Mkuu wa Mkoa wa Lindi, walitarajiwa kufika kijijini hapo jana.

Mmoja wa waathrika wa kimbunga hicho, Abdallah Amour Mcheu, ambaye pia ni mwenyekiti wa kijiji, alisema pigo alilolipata  na wenzake ni  kwa kuwa  wapo katika kipindi  cha utayarishaji mashamba.

Said Ghalama Ndambalilo, ambaye ni mstaafu wa Jeshi la Magereza alisema: “Ni kipindi cha kilimo hatua ya upandaji, hivyo tukio hili ni pigo kwetu, litakalotufanya tuwe na majukumu mawili mazito ya kilimo na ujenzi wa nyumba zetu upya. Tunaiomba serikali kutuangalia kwa jicho la huruma ili kusaidia familia hizi.”

Chanzo;Tanzania Daima