UJENZI WA KAMPASI YA UDSM LINDI WASHIKA KASI

NA EMMANUEL MBATILO, LINDI

UJENZI wa Chuo Kikuu Cha Dar es Salaam Ndaki ya Kilimo Kampasi ya Lindi unaoendelea kujengwa Ngongo Manispaa ya Lindi kupitia mradi wa HEET umefikia asilimia 23 ikiwa ni miezi mitatu tangu kuanza kwa ujenzi .

Akizungumza na waandishi wa habari hivi karibuni katika mradi huo, Naibu Mratibu wa Mradi wa Elimu ya Juu kwa Mageuzi ya Uchumi (HEET) Dkt. Liberato Haule amesema ujenzi huo utakapokamilika kampasi hiyo itakuwa na uwezo wa kuchukua Jumla ya wanachuo 800 kwa wakati mmoja.

Amesema Mradi huo unalenga kuleta mageuzi katika elimu ya juu ili kuongeza mchango kwenye uchumi wa Nchi kwa kuboresha mazingira ya kujisomea , kufanya maboresho ya mitaala ya vyuo vikuu na kuongeza wahitimu wanaoendana na soko la ajira .

Kwa upande wake Mhandisi Mkuu wa Mradi huo Bahati Thomas amesema licha ya mradi huo kwenda kwa kasi ila kuna changamoto ya ucheleweshaji wa material kama mchanga,kokoto na saruji hali inayopelekea kuchelewa kwa baadhi ya hatua.

Nae Mtendaji wa mtaa wa Kiduni ambapo mradi unaendelea, Rajabu Mpili ameipongeza serikali kwa kuwapelekea chuo hicho ambacho ni cha kwanza kwa ukubwa mkoani Lindi.

Amesema hadi sasa kuna zaidi wa wananchi 200 ambao wamenufaika kwa kupata kazi na hali iliyopelekea kuinuka kiuchumi kwa mwananchi mmoja mmoja.

SERIKALI YAHIMIZA ULINZI WA MAENEO TENGEFU NA HIFADHI YA BIOANUAI

SERIKALI imewataka wananchi na wadau katika Mikoa ya Lindi na Pwani kuendelea kulinda maeneo tengefu na hifadhi ya bioanuai ili yaendelee kubaki na ubora na viwango vilivyoainishwa kitaifa na kimataifa.

Hayo yamesemwa Julai 19, 2024 Wilayani Rufiji Mkoani Pwani na Naibu Waziri Ofisi ya Makamu wa Rais (Muungano na Mazingira) Mhe. Khamis Hamza Khamis wakati alipokuwa akizindua hifadhi hai ya Rufiji- Mafia- Kibiti-Kilwa (RUMAKI).

Mhe. Khamis amesema mifumo ikolojia iliyopo katika Hifadhi Hai ni miongoni mwa bioanuai muhimu za Ukanda wa pwani ya Afrika Mashariki inayohifadhi bioanuai nyingi na za kipekee zinazotambulika kitaifa na kimataifa.

”Tunapaswa kufanya kila linalowezekana kuhakikisha kuwa Hifadhi Hai hii inabaki kuwa kwenye ubora na viwango vinavyokubalika kwa mujibu wa vigezo vyetu vya ndani na vya UNESCO” amesema Khamis.

Ameongeza kuwa Hifadhi Hai ya RUMAKI ni kielelezo kizuri cha juhudi nyingi zilizofanywa na Serikali kwa kushirikiana na wadau mbalimbali ikiwemo mashirika ya kimataifa kwa miaka mingi ambayo inaenda sambamba na dhamira na malengo ya uhifadhi maeneo tengefu, hifadhi ya malikale na bioanuai.

Aidha Mhe. Khamis amelitaka Baraza la Taifa la Hifadhi na Usimamizi wa Mazingira (NEMC) kushirikiana na taasisi mbalimbali za Serikali Kutayarisha mipango endelevu na shirikishi ya kulinda, kuhifadhi na kuendeleza hifadhi hiyo ili iendelee kubaki katika ubora wake.

Naibu Waziri Khamis amehimiza wananchi kujiepusha na uharibifu wa mazingira ikiwemouchomaji moto, ukataji misitu ikiwemo mikoko na uvuvi haramu na kuitaka NEMC kutumia mfumo maalum wa tahadhari za majanga ndani ya hifadhi hizo.

Amefafanua kuwa iwapo hifadhi hai ya RUMAKI itaendelea kulindwa na kuhifadhiwa kwa kuzingatia viwango na vigezo vya kitaifa na kimatifa itasaidia shughuli endelevu za kijamii, kiuchumi, kitalii na kimazingira na hivyo kubaki katika mtandao wa Hifadhi Hai Duniani.

Kwa upande wake Mkurugenzi wa Tafiti za Mazingira wa Baraza la Taifa la Hifadhi na Usimamizi wa Mazingira (NEMC), Dkt. Menan Jangu amewapongeza wananchi wa Wilaya za Rufiji, Mafia na Kilwa kwa kuendelea kutunza mazingira juhudi ambazo zimeweza maeneo hayo kutambulika kimataifa.

Amesema NEMC itaendelea kuratibu masuala ya uhifadhi na usimamizi wa mazingira kupitia kwa wananchi na taasisi mbalimbali na kuanisha maeneo yote yenye sifa na vigezo vya kutambulika kimataifa.

”Tunapokuwa na eneo la hifadhi hai lina sifa na malengo makuu matatu ambayo ni maendeleo endelevu, uhifadhi na utunzaji wa viumbe hai vinavyotunzwa kwa faida ya vizazi vya sasa na baadae” amesema Dkt. Menan.

Naye Mwakilishi kutoka Shirika la kimataifa la uhifadhi wa mazingira ulimwenguni (WWF), Bi. Joan Itanisa amesema ameishukuru Serikali kwa kuendelea kuunga mkono juhudi za Shirika hilo katika uendelezaji wa miradi ya uhifadhi na usimamizi wa mazingira nchini.

Ameongeza kuwa uzinduzi wa hifadhi hiyo ni moja ya ahadi zilizowekwa na Wakuu wa Nchi mbalimbali  duniani kuwa ifikapo mwaka 2030 asilimia 30 ya eneo la dunia iwe imehifadhiwa na kupongeza juhudi utayari wa Tanzania katika kutekeleza azimio hilo.

“Uzinduzi wa RUMAKI ni ishara kuwa Tanzania ipo mstari wa mbele katika kuwa kinara wa masuala ya uhifadhi...Tutaendelea kushirikiana na Serikali katika kuhakikisha wananchi wanaozunguza hifadhi hizi wanapata manufaa kutokana na uhifadhi huu” amesema Itanisa. 

 

KILA MMOJA ANA WAJIBU KUSIMAMIA MPANGO JUMUISHI WA HUDUMA ZA AFYA NGAZI YA JAMII-DC NGOMA.

Na. Elimu ya Afya kwa Umma.

Mkuu wa Wilaya ya Ruangwa Mkoani Lindi Mhe. Hassan Ngoma amewataka Viongozi Serikali za Mitaa katika Wilaya hiyo wakiwemo Maafisa Watendaji wa Vikiji na Kata kuhakikisha wanasimamia vyema Mpango Jumuishi wa Wahudumu wa Afya Ngazi ya Jamii kwani utakuwa na Manufaa makubwa katika Sekta ya Afya.

Mhe. Ngoma amebainisha hayo tarehe 17, Julai, 2024 Wilayani Ruangwa katika Kikao cha Kuutambulisha Mpango huo kilichokwenda sambamba na Mafunzo kwa Waganga Wafawidhi wa Vituo vya Afya, Maafisa Watendaji wa Kata na Vijiji vyote vya Halmashauri ya Wilaya ya Ruangwa.

"Mpango Jumuishi huu ni mzuri na utaleta matokeo chanya kwenye sekta ya afya ngazi ya Jamii hapa Ruangwa, hivyo tuusimamie ili kupata matokeo tarajiwa"amesema.

Aidha, Mhe. Ngoma amesema katika kuchagua Wahudumu wa Afya Ngazi ya Jamii ni muhimu kuzingatia sifa muhimu kama zilivyoainishwa kwenye Mpango huo.

"Sifa zilizopo kwenye Mpango huu ni muhimu, tutakosea sana kama tutaamini kuwa matokeo ya kwenye vyeti yatatupa matokeo bora, sifa zilizosema kwenye Mpango mfano utayari wa kujitolea na kushirikiana na jamii ni za muhimu sana kuliko kutegemea matokeo mazuri kwenye vyeti utekelezaji wa kiuhalisia sifuri"amesisitiza.

Halikadhalika, Mhe.Ngoma amempongeza Mbunge wa Jimbo la Ruangwa na Waziri Mkuu wa Jamhuri ya Muungano wa Tanzania Mhe. Kassim Majaliwa kwa kuwa Mstari wa mbele katika kuhakakisha Mpango huo unatekelezwa Wilayani Ruangwa.

Afisa Programu kutoka Wizara ya Afya ,Sehemu ya Elimu ya Afya kwa Umma, Mpango wa Taifa wa Huduma za Afya Ngazi ya Jamii Orsolina Tolage amesema katika kuwasogezea huduma za afya wananchi serikali imeamua kuja na Mpango huo ili kuhakikisha kila kaya inafikiwa na huduma za afya.

"Lengo la Serikali ni kuwa na Mpango Jumuishi mmoja maana mwanzoni kulikuwa na huduma tofauti,ukatili, haki za watoto lakini sasa tunataka tuunganishe Afya,Lishe na Ustawi wa Jamii "amesema.

Kwa upande wake Mwenyekiti wa Maafisa Watendaji Kata Wilaya ya Ruangwa Said Seleman amesema wako tayari kutekeleza Mpango huo.

 

VIJANA RUANGWA WAENDELEA KUJITOKEZA KUWASILISHA MAOMBI YA WAHUDUMU WA AFYA NGAZI YA JAMII KUPITIA MPANGO JUMUISHI

Afisa Mtendaji wa Kijiji cha Chirangalile kata ya Makanjiro Halmashauri ya Wilaya ya Ruangwa Mkoani Lindi   Mohammed Rashidi Abdallah akitoa maelezo kwa mwombaji nafasi za Wahudumu wa Afya Ngazi ya Jamii kupitia Mpango Jumuishi Viola Ngonyani

Na. Elimu ya Afya kwa Umma.

Vijana katika maeneo mbalimbali katika Halmashauri ya Wilaya ya  Ruangwa Mkoani Lindi weendelea kuwasilisha maombi ya kuwania nafasi za Wahudumu wa Afya Ngazi ya Jamii kupitia Mpango Jumuishi.

Akizungumza  Ofisini kwake wakati wa kupokea maombi Afisa Mtendaji wa Kijiji cha Chirangalile kata ya Makanjiro Halmashauri ya Wilaya ya Ruangwa Mkoani Lindi   Mohammed Rashidi Abdallah amesema katika kijiji chake tayari wameshapokea maombi kwa asilimia 85%.

"Tunashukuru zoezi la kupokea maombi linaendelea vizuri katika kijiji chetu ambapo maombi yamefikia asilimia 85% hivyo niwasihi wakazi wa eneo hili hasa vijana waliomaliza kidato cha nne wachangamkie fursa hii ambao wataenda kusaidia katika eneo la afya ngazi ya jamii"amesema.

Naye Viola Ngonyani mmoja wa vijana waliowasilisha maombi ya kuwania nafasi ya Wahudumu wa Afya Ngazi ya Jamii amesema ameamua kuwania nafasi hiyo ili kuweza kushirikiana na Serikali kutoa huduma  za afya karibu zaidi na Wananchi.

Kwa Upande wake Afisa kutoka Wizara ya Afya, Idara ya Kinga, Sehemu ya Elimu ya  Afya kwa Umma, Mpango wa Taifa wa Huduma za Afya Ngazi ya Jamii Orsolina Tolage ametumia nafasi kujibu Maswali mbalimbali yanayoulizwa na vijana huku akisisitiza  kuwa kila kijana mwenye vigezo husika ana haki ya kuwania nafasi hiyo muhimu.

 

Orsolina Tolage Afisa kutoka Wizara ya Afya, Elimu ya Afya kwa Umma, Mpango wa Taifa wa Huduma za Afya Ngazi ya Jamii akitoa elimu na kujibu maswali ya Vijana kutoka Kijiji cha Mbangala Kata ya Makanjiro Halmashauri ya Wilaya ya Ruangwa Mkoani Lindi wakiuliza vigezo muhimu katika nafasi ya Wahudumu wa Afya Ngazi ya Jamii kuelekea uchaguzi wa nafasi hizo.